 Stefnumót við klasafélaga 6.október Hittumst í raunheimum og tökum stöðuna Hvernig stökkvum við á tækifærin og rennitæklum áskoranirnar? Ferðaklasinn býður félögum sínum í opið og heiðarlegt samtal í Grósku, Fenjamýri milli kl 11-12:30 fimmtudaginn 6.október. Boðið verður uppá létta hádegis hressingu. Ef þú ert klasafélagi eða þátttakandi í verkefnum hjá okkur þá viljum við endilega fá þig í hús. Ef þú ert forvitinn og langar að kynnast starfinu – þá endilega láttu sjá þig. Skráning mikilvæg hér.  Ferðatæknifyrirtæki hittast í Grósku 13.október Ert þú með tæknifyrirtæki með lausn fyrir ferðaþjónustu? Þá viljum við hitta þig! Eitt af kjarnaverkefnum Íslenska ferðaklasans er að efla og auka hæfni stjórnenda í ferðaþjónustu þegar kemur að stafrænum ferlum og þróun. Við höfum í því tilliti haldið ráðstefnu árlega í samstarfi við Ferðamálastofu undir heitinu Iceland Travel Tech. Í ár viljum við ganga enn lengra og fá tækifæri til að búa til vettvang fyrir aðila sem þróa og vinna að framgangi tækniframfara í ferðaþjónustu og bjóða því til formlegs fundar þann 13.október í Grósku, Vatnsmýri. Ef þú hefur áhuga á því að taka þátt í að þróa þennan vettvang enn frekar og hafa með því áhrif á dagskrá og efnistök næstu ráðstefnu Iceland Travel Tech sem fram fer 25.maí 2023 þá endilega sendu póst á asta.kristin@icelandtourims.is. Nánari skráning mun fara fram í framhaldi.  Sem liður af þessari þróun munum við standa fyrir vinnustofu milli tækniaðila og ferðaþjónustuaðila sem fram fer þann 27. október en þar munum við m.a kortleggja helstu áskoranir og tækifæri í ferðatækni ásamt því að byggja mikilvægar brýr og þekkingayfirfærslu. Vinnustofan er hluti af Evrópuverkefni sem Íslenski ferðaklasinn og Samband sveitarfélaga á Norðurlandi Vestra eru þátttakendur í og kallast TOURBIT. Í því verkefni mun á seinni stigum gefast kostur á að sækja um tæknistyrki til að leita sér ráðgjafar og tækniþróunar á árinu 2023. Með virkri þátttöku í þessum viðburðum sem framundan eru munu því opnast frekari tækifæri til samstarfs þvert á Evrópu ásamt því að þróa og eða hanna nýjar lausnir. Í sumar fóru fram fjöldinn allur af vinnustofum þar sem farið var yfir ýmiss málefni tengd tækni og áskorunum í ferðaþjónustu. Hvetjum við ykkur til að horfa á upptökur sem má finna hér. Tveir af fyrirlesurum í þessari vinnustofu röð voru frá Íslandi en það var Aðalheiður Guðmundsdóttir, framkvæmdastjóri Vök Baths og Lee Roy frá AwareGo sem stóðu vaktina fyrir okkar hönd. Að lokum langar okkur að bjóða þeim sem hafa áhuga og tök á að taka þátt í sérstökum Digital Readiness Index. Þetta er ákveðið sjálfsmatskerfi sem hjálpar stjórnendum að sjá hvar þau eru stödd í sinni stafrænu vegferð.  Ábyrg ferðaþjónusta – aukum forskotið er farið af stað Fræðsluverkefnið okkar Ábyrg ferðaþjónusta fór af stað aftur eftir sumarfrí en fyrsti fræðsluviðburðurinn var 27.septemember. Þessi fræðslusería hófst í vor en hlé var tekið á því yfir sumarmánuðina. Um 60 íslensk ferðaþjónustufyrirtæki eru virkir þátttakendur en markmiðið er að fyrirtækin öðlist þekkingu og hæfni til að gera sína eigin sjálfbærnistefnu og birta hana á heimasíðu fyrirtækisins núna í desember 2022. Verkefnið er liður í að gera íslenska ferðaþjónustu sýnilegri sem sá drifkraftur jákvæðra breytinga, þróunar og uppbyggingar sem hún sannarlega er í okkar huga. Til þess að áfangastaðurinn Ísland geti skipað sér í sess þeirra fremstu þegar kemur að sjálfbærni og ábyrgð er mikilvægt að tryggja þátttöku sem flestra, bæði þeirra sem stærri eru og eins þau allra minnstu. Á þessum fyrsta fræðsluviðburði haustsins fengum við heldur betur frábæra aðila til að leiða okkur inní hringrásar og hönnunar hagkerfi ferðaþjónustunnar ásamt því að fá frábæran innblástur frá fyrirtæki í ferðaþjónustu um hvernig þau hafa tengt megin áherslur ábyrgrar ferðaþjónustu við heimsmarkmið sameinuðu þjóðanna. Allir fyrirlestrar eru teknir upp og fá þátttakendur þéttan fræðslupakka auk heimaverkefnis sem leiðir þau betur í áttina að aukinni stefnumótun í sjálfbærni. Fyrirlesarar að þessu sinni voru: Stefán Einarsson, sérfræðingur í sjálfbærni og hringrásarhagkerfinu, Sein Consulting (stefan@seinconsulting.com) Andrés Jónsson, deildarstjóri hjá Icelandair og stjórnarmaður í Íslenska ferðaklasanum Hildur Guðbjörg, einn eigenda Midgard Base Camp Við erum enn og aftur minnt á það, í þessu einsog svo mörgu, að hvert og eitt okkar komumst við aðeins áleiðis en saman náum við raunverulegum árangri.  Kynning fyrir nemendur í Háskóla Íslands Háskólaheimsóknir eru hluti af haustverkum Ferðaklasans og héldum við kynningu um starfsemina og þau verkefni sem við erum með í gangi fyrir nemendur í áfanganum Skipulag og stefnumótun í Háskóla Íslands núna í september. Frábær hópur nemenda sem sannarlega á framtíðina fyrir sér þegar kemur að uppbyggingu í ferðaþjónustunni.  TechBBQ – Kaupmannahöfn Íslenski ferðaklasinn var hluti af sendinefnd á Nýsköpunar og tækniráðstefnunni TechBBQ í Kaupmannahöfn sem Íslandsstofa hélt utanum. Það var algjörlega frábært að hitta allt þetta frábæra fólk, vera hluti af þessu magnaða teymi ásamt því að fà tækifæri til að tala um klasann okkar og íslenska ferðaþjónustu í bústað íslenska sendiherrans í Danmörku. Nú þurfum við að taka höndum saman og halda áfram brúarsmíði milli tæknifyrirtækja og ferðaþjónustufyrirtækja því þar liggja ótal tækifæri í átt að aukinni sjálfbærni og nýsköpun  Samnorrænt verkefni um kynferðislega áreitni í ferðaþjónustu Íslenski ferðaklasinn er stoltur þátttakandi í samnorrænu verkefni sem er keyrt áfram hér á landi af Háskóla Íslands í samstarfi við Dalarna Háskólann í Svíþjóð og Norska hótelstjórnunarskólann. Verkefnið er styrkt af rannsóknarstofnuninni Norrænar upplýsingar um kyn (NIKK) í gegnum Norrænu ráðherranefndina. Markmið verkefnisins er að nýta fortíð og nútíð til að fræða í framtíð. Fyrsta vinnustofan var haldin 21. September sl. Frábær vinnuhópur sem kom saman frá ýmsum áttum innan ferðaþjónustunnar sem og verkalýðshreyfingarinnar og Vinnumálastofnunar.  Ferðaþjónustuverkefni kynnt í Helsinki Í lok ágúst stóð Visit Helsinki fyrir ráðstefnu þar sem fjöldi norrænna verkefna sem studd eru af Norrænu ráðherranefndinni og Nordic Innovation voru kynnt. Vaskur hópur Íslendinga mætti á svæðið til að sækja sér innblástur og efla tengslanetið meðal norrænna samstarfsaðila. Íslenski ferðaklasinn var hluti af þremur kynningum sem fram fóru á ráðstefnunni en það voru verkefnin Nordic Food in Tourism sem lauk í upphafi árs 2022, Nordic Regenerative Tourism sem líkur í lok árs 2022 og er stýrt af Ólöfu Ýrr Atladóttur ásamt Nordic Travel Tech Network sem Per Arne Fiersted, samstarfsaðili Ferðaklasans í Noregi stýrir. Hægt er að nálgast kynningar frá ráðstefnunni hér. Viltu vera með í að efla íslenska ferðaþjónustu? Hafðu samband |
 Ásta Kristín Sigurjónsdóttir Framkvæmdastjóri Íslenska ferðaklasans Email: asta.kristin@icelandtourism.is S: 861-7595  Rakel Theodorsdóttir Verkefnastjóri hjá Íslenska ferðaklasanum Email: rakel@icelandtourism.is |
